«Шүрәле ничә телдә сөйләшә?»

22 апрель көнне Габдулла Тукай исемендәге Яңа Кырлай урта белем бирү мәктәбенең 8 нче сыйныф укучылары «Пушкин картасы» программасы кысаларында «Шүрәле ничә телдә сөйләшә?» дигән темага бик кызыклы, мавыктыргыч һәм бай мәгълүматлы лекция тыңладылар. Лекция барышында балалар «Шүрәле» әкиятен рус теленә иң беренче тапкыр кем тәрҗемә иткән, тәрҗемәләр барысы да уңышлы булганмы, башка халык әдәбиятларында да Шүрәлеләр бармы кебек һәм башка үзләрен кызыксындырган сорауларга җавап алдылар.
Музеебызда хәзергесе көндә “Шүрәле” әкиятенең 20 телгә тәрҗемәсе бар. Алар арасында киң кулланыла торган телләрдән тыш, венгр, якут, француз, каракалпак телләренә тәрҗемәләр дә безнең фондларыбызда саклана.
2021 елда Татарстан китап нәшрияты бөек Тукаебызның йөз егерме әсәрен инглиз теленә бастырып чыгара (Р. Бохараев, И. Генн тәрҗемәләре). Алар арасына шагыйрьнең «Исемдә калганнар» автобиографик әсәре дә кергән. Соңыннан укучылар үзләре дә бик теләп, «Шүрәле» әкиятен инглиз телендә укыдылар һәм тәрҗемә эшенең бик җаваплы һәм катлаулы икәнлегенә төшенделәр.